عادي!!

 نشرت في جريدة الأنباط الأردنية 12/10/06

(ليش الأسعار زايدة؟…. البنزين صاير نار!… شوف هاللوح كيف بسوق؟؟ … الحق مش عليه.. الحق على اللي أعطاه الرخصة!… شفت أبو زهدي شو صار يعمل؟ …. صحن الحمص صار ينقصه للنص!

شو هالخبز يا زلمة؟ والله كأنك بتوكل علكة !.. أعوذ بالله ما أكثر المطبات ! الواحد صار بدوا راتب خاص عشان تصليح السيارة!.. شو صار مع ابنك بالتوجيهي؟ … سمعنا مصعبين الأسئلة، وإنو الأساتذة نفسهم ما بعرفوا يحلوها؟!!… هاظا غير الأسئلة اللي تسربت لناس وناس! …. يا رجال شفت هالدكتور؟ انت متأكد إنو دكتور؟! لا يكون بيطري يا ابو زهدي؟!

شو هالبرامج اللي بيعرضوها برمضان على التلفزيون الأردني؟! … من دعايتها مبينة فاشلة " وماصخة " ! … لا الكوميدي بضحك ولا التراجيدي حزين ! .. لو يخلو رمضان بلا هالبرامج أحسن النا والهم!… شفت أبو علي لا بحكي ولا بشكي؟ ولا كأنا بنعرفه وبعرفنا! … يا حوينة الأيام اللي قضيناها معه!… يا ابن الحلال الولد مجنني ! .. لا رضي يدرس ولا بدو يشتغل! نايم في البيت عطال بطال! .. أكل ومرعى وقلة صنعة!!… بعدين شكلوا حاط عينو على وحدة من بنات الحارة! … كل ما احكيلو بدك تجوز بنت عمك بيحاول يهرب من الموضوع! وبيتحجج انو لسا ما اشتغل ومش ناوي يتجوز هسا!… يا زلمة الجو نار هاليومين! الله يعافينا من نار جهنم! الواحد ماشي وغرقان بالعرق!.. سمعت امبارح خطبة الجمعة؟ والله لو طلعت أخطب أنا لخطبت احسن من الشيخ! … )

…. السطور أعلاه ليس تسجيلا لهذيانات مريض بالحمى : إنه حوار عادي يومي يدور بين أي مواطنين أردنيين مدمنيين على التذمر في اي لحظة وأي زمان!